«Қазақстанның орнықтылық қоры» акционерлік қоғамы (бұдан әрі – Қоғам) Қоғамның жалғыз акционерінің 2020 жылғы 10 қыркүйектегі № 20 және 21 шешімдерімен басқарма мен директорлар кеңесінің қазіргі құрамының жаңа мерзімге қайта сайланғандығы туралы хабарлайды.

Қоғамның жалғыз акционерінің 2020 жылғы 10 қыркүйектегі № 20 шешімімен келесі тұлғалар Қоғам Басқармасының мүшелері болып сайланды:

1) Оспанов Ерболат Серікұлы – Басқарма төрағасы;

2) Әбішев Асқар Бауыржанұлы – Басқарма төрағасының орынбасары;

3) Қыдықов Рүстем Елтайұлы – Басқарма төрағасының орынбасары;

4) Бейсембиев Александр Касымович – басқарушы директор;

5) Суанкулова Анар Нуржановна – қаржы директоры.

Қоғам Басқармасының өкілеттік мерзімі 2020 жылдың 15 қыркүйегінен басталып, 1 (бір) жылға бекітіледі.

Қоғамның жалғыз акционерінің 2020 жылғы 10 қыркүйектегі № 21 шешіміне сәйкес, Қоғамның Директорлар кеңесінің құрамына келесі адамдар сайланды:

1) Біртанов Есжан Амантайұлы – жалғыз акционерден өкіл ретінде – Қазақстан Республикасы Ұлттық Банкі Төрағасының орынбасары;

2) Оспанов Ерболат Серікұлы – Қоғамның Басқарма төрағасы;

3) Джованни Капаннелли, тәуелсіз директор ретінде.

Қоғамның Директорлар кеңесінің өкілеттік мерзімі 2020 жылдың 19 қыркүйегінен басталып 3 (үш) жылға бекітілді.

«Баспана Хит» ипотекалық бағдарламасы бойынша пайыздық мөлшерлемелер 11,25%-дан 10,75%-ға дейін төмендетілді деп хабарлайды Қазақстанның орнықтылық қоры.

Пайыздық мөлшерлемедегі өзгерістер Қазақстан Республикасы Ұлттық Банкінің (бұдан әрі – ҚРҰБ) базалық мөлшерлемені 9,5%-дан 9%-ға дейін төмендету бойынша шешімін жариялауы нәтижесінде болды. «Баспана Хит» бағдарламасы бойынша жылдық сыйақы мөлшерлемесінің мөлшері ҚРҰБ базалық мөлшерлемесіне байланысты болатынын (ҚРҰБ базалық мөлшерлемесі +1,75%) еске саламыз.

Бұл бағдарлама бойынша мөлшерлеме ипотекалық қарыз шартын жасау сәтінде тіркеледі және клиент үшін өзгеріссіз қалады. Осыған байланысты пайыздық мөлшерлемедегі өзгерістер жаңа қарыз алушыларға ғана қатысты болады.

«Баспана Хит» бағдарламасының талаптарына сәйкес 300 млрд теңгеге қарыз беру жоспарланып отыр, бүгінгі таңда оның 224 млрд теңгесі игерілді.

«Қазақстанның орнықтылық қоры» АҚ (Fitch, «BBB» / «Тұрақты» болжамы, бұдан әрі – ҚОҚ) 27,7 млрд теңге табысты дивидендтер төлеуге бағыттады. Төлем ҚОҚ акционері – Қазақстан Республикасының Ұлттық Банкі алдындағы міндеттемелерін орындау аясында, сондай-ақ Қазақстан Үкіметінің «Мемлекеттік акциялар пакетінің дивидендтері және ұйымдардағы мемлекеттік акциялар бойынша кірістер туралы» қаулысына сәйкес жүзеге асырылды.

ҚОҚ – Қазақстан Республикасы Ұлттық Банкінің еншілес ұйымы.

Негізгі міндеттері:

банк секторының қаржылық тұрақтылығына ықпал ету;

ипотекалық тұрғын үй заемдарының қол жетімділігін қамтамасыз етуге қатысу;

ипотекалық тұрғын үй заемдарын (ипотекалық қарыздар) қайта қаржыландыру тетігін іске асыруға қатысу;

басым жобаларды несиелеу механизміне қатысу;

Қазақстан Республикасы азаматтарының қарыздық жүктемесін азайту жөніндегі шараларды іске асыруға қатысу болып табылады.

Мамыр айының соңынан бастап «7-20-25» және «Баспана Хит» бағдарламалары бойынша ипотекалық несиелер беру қарқыны қалпына келді. Бүгінде олар карантин басталмай тұрғандағы деңгейіне жетіп отыр. Ол – аптасына орта есеппен 600 несие немесе 4 – 4,5 млрд теңге. Қарқынның қалпына келуі халыққа қызмет көрсету орталықтары, нотариустар, сатушылар мен құрылыс компаниялары, банктер жұмысындағы шектеулерді алып тастауға байланысты болды.

Төтенше жағдай және карантин кеінде, наурыз айының ортасы мен сәуір айлары аралығында «7-20-25» және «Баспана Хит» ипотекалық бағдарламалары бойынша берілген ипотекалық несиелер көлемі 2 есеге азайып кеткен еді. Карантиндік шаралар қолданылған кезеңді ескерсек, осы жылдың 5 айында банктер жалпы сомасы 94 млрд теңге болатын 9 мыңнан астам ипотекалық несие берген. Бұл өткен жылдың сәйкес кезеңімен салыстырғанда 1500 несиеге немесе 21 млрд теңгеге артық.

Естеріңізге сала кетейік, «7-20-25» бағдарламасы Қазақстан Республикасының Тұңғыш Президенті Н.Назарбаевтың бастамасымен қолға алынып, 2018 жылдың шілдесінде өз жұмысын бастады. Ресми табысы бар, атында үйі жоқ, басқа ипотекалық несиесі жоқ кез-келген Қазақстан азаматы ипотека алу үшін 8 банкке жүгіне алады. «7-20-25» бағдарламасы іске қосылғаннан кейін, 2018 жылдың қазан айында, тұрғындар өтінішін ескере отырып, қолданыста болған тұрғын үйді сатып алуға мүмкіндік беретін «Баспана Хит» бағдарламасы ашылды. Екі бағдарламаны Халық банкі, Сбербанк, ЦентрКредит банкі, АТФБанк, Еуразиялық банк, Bank RBK, Jysan bank және ForteBank сынды 8 қаржы ұйымы іске асырады. Оператор – Қазақстанның орнықтылық қоры.

Бүгінгі таңда, 40 мыңнан астам отбасы «7-20-25» және «Баспана Хит» ипотекалық бағдарламалары арқылы үйлі болды. Оларға берілген несие көлемі 388 миллиард теңгеге жетті.

Елде төтенше жағдай енгізілген сәттен бастап «7-20-25» және «Баспана Хит» бағдарламаларының 6887 клиенті үшін жалпы сомасы 2 млрд теңгеден асатын ай сайынғы төлемдер кейінге қалдырылды.

Қазақстан Республикасының Ұлттық банкі коронавирустық пандемия салдарынан қиын жағдайға тап болған қарыз алушыларға қолдау көрсету мақсатында ипотекалық несиелердің төлемдерін шегеруге шешім қабылдаған болатын.  Шегеру негізгі қарызды және (немесе) сыйақыларды айыппұлдар мен өсімпұлдарсыз кейін өтеуді көздейді және қарыз алушылардың несиелік тарихын бұзбайды. Банктер төлемдерді кейінге қалдыру бойынша азаматтар өтінішін 2020 жылдың 15 маусымына дейін қабылдайды.

Ұлттық банктің ипотекалық бағдарламалары бойынша бүгінгі күні 38 065 отбасы үйлі болды. Оның ішінде 14 824 несие «7-20-25» бағдарламасы бойынша, 23 241 несие «Баспана хит» бағдарламасы бойынша берілді.

Қазақстан қор биржасының (KASE) Листингтік комиссиясының шешімімен «7-20-25» тұрғын үй ипотекалық бағдарламасының операторы – Қазақстанның орнықтылық қорынының (бұдан әрі – ҚОҚ) облигациялары KASE ресми тізімінің «Балама» алаңынан «Негізгі» алаңына ауыстырылды. Бұл ҚОҚ облигацияларының биржалық қаражат тарту бойынша оң тәжірибесі бар ірі және орнықты қаржы компаниялардың алаңдарына еңгізілгенін білдіреді.

Компанияларды тізімнен тізімге ауыстыру компанияның және оның бағалы қағаздарының ресми тізімнің өлшемшарттарына сәйкестігін қадағалап отыратын KASE тәуелсіз шешімінің негізінде жүргізіледі.

Биржада орналастырылған ҚОҚ облигацияларының жалпы сомасы 2020 жылғы 11 мамырдағы жағдай бойынша шамамен 400 млрд. теңге құрайды. Тартылатын қаражатты компания «7-20-25» тұрғын үй бағдарламасын қаржыландыруға жұмсайды.

ҚОҚ облигацияларының шығарылымдары бойынша төлемдер бекітілген кестеге сәйкес жүргізіледі. Мәселен, ағымдағы жылғы сәуір айының басында ҚОҚ облигацияларды 108,5 млрд. теңге сомасына өтеді. Оның ішінде купондық сыйақының мөлшері 8,5 млрд. теңгені құрады.

«Қазақстанның орнықтылық қоры» АҚ («BBB» / «Тұрақты» болжам, Fitch, бұдан әрі – ҚОҚ) өз облигацияларын өтеу мақсатында құнды қағаздардың ұстаушыларына жалпы сомасы 108,5 млрд теңгені уақтылы және толықтай төледі. Оның ішінде купондық сыйақы 8,5 миллиард теңгені құрайды.

Облигацияларды өтеу орташа мөлшерлемесі жылдық 9,9% бойынша орналастырылған үшінші облигация шығарылымы аясында өтті.

ҚОҚ «7-20-25» ипотекалық бағдарламасын нарықтық тетіктер арқылы қаржыландырып отыр. Ол үшін Қазақстан қор биржасында облигацияларды орналастыру арқылы қаржы көздері тартылады. Қазіргі таңға дейін осы мақсатта орналастырылған облигациялардың жалпы сомасы 370,3 млрд теңгені құрап отыр. Облигациялардың бес траншы жарық көрді. Төлемдер бекітілген кестеге сәйкес жүргізіліп келеді.