Соңғы уақытта өзін ипотекалық брокерлер, агенттер, несие кеңесшілері ретінде таныстыратын түрлі алаяқ «көмекшілердің» белсенділігі артты. Олар «7-20-25» ипотекалық бағдарламасының танымалдығы мен сұранысқа ие екенін пайдаланып, адамдардан ақша алу мақсатында несие лимитін, орындарды, броньдарды, несие мақұлдануын, банк немесе құрылыс компанияларындағы кезекті сатып алуды ұсынуда.
Абай болыңыздар! Банктердің шешім қабылдау процестері, несие беру механизмі толықтай автоматтандырылған және сырттан ықпал ету мүмкіндігі жоқ. Шын мәнінде, алаяқтар халыққа жоқ қызметті сатып отыр. «7-20-25» бағдарламасы бойынша көмек ұсынатын жеке немесе заңды тұлғалармен байланысқа түспеңіздер. Ешкімге еш уақытта ақша бермеңіздер.
Сондай-ақ мессенджерлерде Қазақстанның орнықтылық қоры атынан алаяқтық сипаттағы хабарламалар жиілеп кетті. Алаяқтар WhatsApp хабарламалар таратып, байланыс орнатуға және зиянды бағдарламаларды орнатуға тырысуда. Қор қызметкерлері еш уақытта жеке тұлғалармен мессенджерлер арқылы хат алмаспайды.
Алаяқтардың хабарламаларын бұғаттап, ашпауды, олармен байланысқа түспеуді сұраймыз. Хабарламадағы сілтемеге өту немесе файлды ашу құрылғыңыздың бұзылуына алып келуі мүмкін.
Қор үнемі жемқорлық пен алаяқтықтың алдын алу бойынша банктермен кеңес жүргізіп отырады. Егер сіз алаяқтық немесе жемқорлықтың куәсі болсаңыз, дереу құқық қорғау органдарына хабарласуыңызды сұраймыз. Сұрақ немесе күдік туған жағдайда, Қорға +7 (727) 277-20-25 нөмірі арқылы хабарласуға болады.
Бейнероликте ипотекалық брокерлер, несие кеңесшілері және өзге де «көмекшілердің» түрлі айла-тәсілдері жан-жақты түсіндірілген.